صابرين تكشف رد فعل أبنائها على زواجها من عامر الصباح: كانوا خايفين عليا منه

الوقائع الإخبارية : صابرين على زواجها من عامر الصباح: ولادي كانوا خايفين عليا منه

كشفت صابرين خلال حلولها ضيفة على برنامج "الراديو بيضحك" عن قصة حبها من المنتج عامر الصباح قائلة: "بداية الحب كانت من 32 سنة، كنت بعمل فيلم "أنا والعذاب وهواك" وكان إنتاج والد عامر، وإخراج أستاذ محمد سالمان، وكان صديق والده، وخلال تصوير المشاهد دخل عامر وقولتله أهلًا يا أستاذ منتج، أنا كنت بتاعة إفيه حاضر طول الوقت، وهما كانوا بيضحكوا على الكلام المصري جامد، وإحنا بنصور اتولدت قصة الحب دي".

وتابعت: "هو كان متزوج بنت عمه وكان على خلاف معاها في الفترة دي، وبدأت شرارة الحب تحصل، وأنا قولت ليه هدخل نفسي في المتاهة دي، ووالده توفي وهو سافر وبعدنا عن بعض، وهو انفصل عن زوجته الأولى واتجوز تاني، وأنا اتجوزت وانفصلت واتجوزت تاني وانفصلت".

وأضافت: "وبعدين بالصدفة البحتة الصديقة لمياء عبدالحميد وأخوها وائل فهمي عبدالحميد، كان بيعرض عليا مسلسل واتقابلنا وكان في صديقة من الإنتاج بتكلمه وقالت إن هي راجعة مع عامر الصباح وهيعملوا مسلسل، أنا رجعت بالزمن وقالتلي إنه طلق، قولتلها أنا كمان اتطلقت بلا جواز وقعدت أضحك، وقعدت أحكي لـ لمياء ووائل على قصتي مع عامر، وفجأة لقيت رقم لبناني بيتصل عليا، كنت فكراه برنامج وطلع عامر الصباح".

و استكملت: "قالي أنا مسافر لندن وهرجع أتجوزك، إللي بعدنا الـ32 سنة دول أنا لازم أتجوزك دلوقتي حالاً بلا مقدمات، قولتله أنا عندي 3 رجالة، قالي سيبي كل حاجة حلوة في وقتها، وفجأة حسيت أني بنت ولادي مش أمهم".

واختتمت: "ولادي كانوا خايفين عليا أني لو اتجوزت عامر الصباح أرجع للخلافات وأبقى متضايقة، وقالولي خدي بالك، ولما قعدوا معاه ولقوه عاقل بحكم سننا، وأن السن ده مش سن حب اتطمنوا، وأنا لو مكنتش أعرف عامر من زمان، كان مستحيل أني أتجوز تاني".

صابرين وزواجها من المنتج اللبناني عامر الصباح

بعد حفل زفاف الفنانة ريم سامي في شهر مايو الماضي، تصدر اسم الفنانة صابرين ترند منصات التواصل الاجتماعي، خاصة عقب إعلان زواجها من المنتج اللبناني عامر الصباح، حيث ظهر الثنائي معاً لأول مرة أمام الجميع في حفل الزفاف.

يمكنكم متابعة آخرهن ياسمين رئيس.. نجمات أعلنَّ ارتباطهن في شهر مايو

آخر أعمال صابرين

يُعد مسلسل "مسار إجباري" آخر أعمال الفنانة صابرين، والذي تم عرضه في شهر رمضان الماضي 2024، وقدمت من خلاله دور والدة عصام عمر، وتدور أحداثه في إطار اجتماعي مشوق، وأبطاله عصام عمر، وأحمد داش، وصابرين وتأليف باهر دويدار وإخراج نادين خان.