جلسه مع خفيف الدم
فايز شبيكات الدعجه
في مناسبة ما اجلسني سوء الحظ بجانب رجل خفيف الدم جدا.. وقال. كيفك؟
قلت الحمد لله
اخبارك؟
قلت تمام
وين ايامك؟
قلت بين الايادي
شو عامل هالايام؟
ولا شي
كيف صحتك؟ .
تمام
ضعفان شوي
صحيح
انشالله ما عندك سكري وضغط؟
لا
شو فيه ما فيه؟
سلامتك صافيه وافيه
وين بتروح وين تيجي؟
يعني هون وهون
كيف الاهل؟
تمام
لسا ساكن بنفس المنطقه؟
اه
الله يرحم ابوك وامك
آمين
آخر مره التقينا عند الحلاق؟
اه
شو اخباره زمان ما حلقت عنده؟
منيح
عندك سياره؟
عندي
شو نوعها؟
اوبل
كهربا؟
لا
تصرف بنزين؟
شوي
كم تمشي بالتنكة؟
٢٠٠ كيلو
انشالله الها قطع ومش غاليه؟
إلها، وغالية شوي
شو في اخبار؟
ما في
الطقس اليوم شوب
صحيح
وازمة سير
اه
لسا تارك التدخين؟
اه
كم سنه الك تاركه؟
١٥
والله انك جبّار
اه
سمعت اخبار اليوم؟
لا ما سمعت
بحكو ممكن تصير حرب
قلت حرب شو
في الاقليم
ممكن كلشي بيصير
فكرك إيران تهاجم إسرائيل علشان اغتيال الشهيد اسماعيل هنيه؟
اه، اتوقع ضربه عالخفيف...رشة صواريخ
كيف بتقضي وقتك؟
يعني هيك وهيك
ليه ما نزلت للانتخابات؟
ما نزلت
ليه؟
هيك
ناوي تنتخب؟
طبعا
صاير نشاطك خفيف عالفيس بوك؟
صحيح
انشالله ما في شي،، بطلت تنشر؟
لا ما في شي
كيف شايف الوضع؟
اي وضع
يعني بشكل عام
منيح ماشي حاله
في غلا بالاسعار
اه
الخضره نار
صح
ورفعوا الدجاج
اه
الله يعين الناس
يا رب
الناس ماكله هوا
اه
وبيقولوا في مخدرات كثيرة
بسمع
وصار التهريب مو بس من الشمال، كمان صار من الجنوب.
قلت له، مزبوط
يعني مشكلة المخدرات خرجت عن السيطره.
قلت له مين حكالك!؟
واحد
تردش عليه.هذا واحد مغرض
وبسمع في شراء أصوات للانتخابات
ما سمعت
الصوت بخمسين نيره
قلت مين حكالك
واحد
قلت نفسه تع المخدرات
اه
تردش عليه هاي اشاعه هدامه
شو رايك بالي صاير بغزه؟
لا حول ولا قوة الا بالله
يعني اذا توقفت الحرب الان مين المنتصر ومين الخسران؟
قلت له، بعرفش
شو اخبار عبدالكريم؟
مين عبدالكريم
جاركو
رحل زمان
وين؟
ما بعرف
عندك تلفونه؟
لا
لحيه غانمه
صحيح
ما بعرف ليه رحل الله يسامحه.. كان رجل فاضل؟
كل الناس خير وبركة
وانتا كيفك؟
قلتلك منيح
خلينا نشوفك؟
انشالله
فكرك يفوز ترمب؟
ممكن
حاب انو يفوز؟
اه
ليه؟
هيك
شكلك معجب فيه؟
كثير
اشرب الشاي بلاش يبرد
خلص، شكرا ما بدي
اشرب ميَّه
شكرا ما بدي
الميه منيحه
صحيح
لازم تشرب ٣ لتر كل يوم
صح.
تتغدى عندي بكره، بالله عليك اساويلك غدا وتيجي انت والي تحبه.
شكرا. بكره مشغول.
تلفوني معك؟
معي
بالله عليك اي وقت ترن وبتقلي هيني جاي اتغدى عندك، ماشي؟
قلت اتوكل عالله بيصير خير
قال عن اذنك بدي اروح... بلزمك شي؟
الله معك.
تابعوا الوقائع على 
